КУМАК БА ЯТИМОНУ МАЪЮБОН – ПАЙГИРӢ АЗ СИЁСАТИ ИҶТИМОИИ ПЕШВОИ МИЛЛАТ
Дарахт бо обу инсон бо меҳр месабзад. Фарзанди одам ҳамеша ба дилгармӣ ва ба меҳру муҳаббати самимӣ ниёз дорад. Бахусус, дар ҳоле, ки як нафар ятим мемонад, бештар ниёзманди он мешавад. Ва аз ин дида эҳсоси хуштар нест, ки як инсон як ятимро хурсанду хандон месозад. Зеро ятимон дар зиндагӣ афсурдаю дилозурда, ниҳоят нозуктабъ ва бештар аз ҳама ба пуштибонию муҳаббат ниёз доранд. Бузургону гузаштагони мо баҳри дилсӯзии ятимон ва дасти сахо дароз кардан ба онҳо панду андарзҳои бешумор ба ояндагон боқӣ гузоштаанд. Шайх Аттор барҳақ фармудааст:
Ҳар кӣ хандонад ятими хастаро,
Боз ёбад ҷаннати дарбастаро.
Рӯзи 29–уми декабри соли 2023 муассисаи давлатии таълимии “Литсейи инноватсионии Душанбе”-и назди Донишгоҳи технологии Тоҷикистон низ бо пуштибонӣ аз сиёсати Президенти ятимпарвари мо муҳтарам Эмомалӣ Раҳмонро пайгирӣ намуда, бо роҳбарии директори литсей Анваров Муриватшо як гурӯҳ кормандони литсей, аз ҷумла, раиси созмони хонандагони литсей Пирова Мавҷуда, Раҷабов Носир, Раҷабова Нилуфар, Қурбонов Хайриддин, Бегматов Муҳаббат, Абдулҳақов Далер дар арафаи Соли нав бо мақсади кумак ба ятимон, нафарони имконияташон маҳдуд ва ашхоси камбизоат ба Мактаб–интернати рақами 2 барои кӯдакони имконияташон маҳдуд бо туҳфаҳои солинавӣ рафтанд. Баъди ин сафар мо дубора шоҳиди он гардидем, ки маҳз сиёсати ятимпарваронаи Пешвои миллат муҳтарам Эмомалӣ Раҳмон боис шудааст, ки имрӯзҳо ятимон заррае дарди бекасиро эҳсос накарда, дар ятимхонаҳо дар муосиртарин шароит илм меомӯзанду дониш аз бар мекунанд.
